Zarabowany Bombaj czyli jak to było z katastrofą kultowego lokalu Ryfamy

Na poczontku siyrpnia piyndziesiont lot nazot przijon ech we PEBEROWIE robota za mularza, robota zaczonech na "Bombaju". Był to Dom Kultury ze "Ryfamy".

Wielo staro chaupa piyrszo tajla miała dwa sztoki, a drugo jedyn sztok, na kieryj twoł wielgi remont. Strop i ściany we pojszotku nad piyrszym sztokym były nowe, nowy był tysz stropodach, ale nad parterym stropy i sklepiynia łostały stare.

Na stropodachu na kierym na ściankach były jusz pokładzione betonowe płyty korytkowe brakowało yno szlichty i papy.
Tukej murowali my ściany zewnyntrzne, i mono kuminy.

Jednego dnia murowali my pośrednio ściana nad parterym tyj niszszej tajle. Przerwa na śniodani bardzo sie przeciongała bo mulorz Adam i operator wyciongu i betoniarki poszli na piwo i sie zasiedzieli doś dugo.

W końcu brygadzista godo zanim przidom idymy na rysztonek wyrobić miszong ze kalfasow.

Dugo my niy porobili bo łoroz zaczon sie rumor choby sie suły jaki bergi ze wywrotki, ale twało to doś dugo, coś sie dzioło na wyrszej tajli. Zeskoczyli my ze rysztonku i na doł po schodach, kiere były na pojszodku miyndzy wysokom a niskom tajlom Bombaju.

Dopiyro w biegu po schodach pokozało sie, że sujom sie na nie konski muru, cegły i gruz. Na szczyńści nikogo niy trefiło. Na dole ze biura wylecioł majster nad nim przepolały sie pomatlane droty elektryczne, łogiyń suł sie jak przi szfajsowaniu, na szczyńści kapnył sie i ucik spod łognia

Droty sie poprzepolały i sleciały na ziymia, a łot sondu wracoł jusz halanger Felek.

Za chwila tysz slecioł sie cołki sond kiery tu je blisko, prokurator pytoł sie czy som poszkodowani ludzie i kozoł zaro spisać fszyskich kierzi byli na budowie.

Nojważniejszy był majster, mody chop dwadziyścia pora lot stary. Potym brygadzista chopisko spod Raciborzo, Rafał zastympca brygadzisty. Nojstarszy był Felek zawsze uśmiychniynty chudy chopek przed pyndzyjom, uśmiechniynty monej bes to co ni mioł zymbow, godoł co je warszawiok, a żył na kryja ze "babciom" we Leszczynach.

Potym mularze Tadek i Adam dwa wicmany, sztyjc sie robili na bzdury jak jedyn przibił gwoździami do delofki arbajtszuły, to drugi przibił mu krokfiokami do delofki halpki. Jeszcze operator łod wyciongu i betoniary sztyrysetki i dwuch halangrof co niydowno wyleźli ze heresztu, mularze Józek i Michał ze Boguszowic prziszli z wojska do brygady jusz chyba po tym jak sie Bombaj zarabowoł.

Prokurator nakozoł coby zostawić ze dwuch chopow na noc zgłosiłech sie ze Tadkym. Pod Bombaj sleciało sie fol ludzi kierzi mogli podyńść yny za sklep "Dom Dziecka". Co ciekawe niy pamiyntom coby przijechały jaki sanitarki abo fojerwera.

Potym brygadzista padoł co po śniodaniu chcioł loć szlichta na dachu, to by była masakra bo stropodach zarabowoł sie do pojszotka do kierego tysz zjechały betonowe płyty korytkowe.

Po katastrofie wszyjscy śmioli sie ze Felka że uciekoł jak hazok pod sond, Felek to tysz był chop do szpasu, rosprawioł, bes wojna był wywieziony do Bauera, kierego sztyjc robił za błozna, Bauer posłoł go po Heugabel/widły to przinios mu grabie i tak za kożdym razym.

Na Bombaju naszo brygada łostała jeszcze pora dni, łodgruzowali my ulica od strony chaupy we kierej miyszkoł Kucharczyk dyr. Rybnickigo Zjednoczynio PW, cegły ciepali my rynkami na ziła, niy było ani kopary ani białoruśki do ładowanio, potym pojechali my zurik na RYFAMA.

Tukej pucowali my ściany we piwnicy jednyj hali, murowali kanały wyntylacyjne, a najdłużyj skuwali młotym pneumatycznym gusowe flizy na hali kuźni.

Na kuźni było gorko i głośno besto łazili my na zelter, przeważnie z Adamym, we jednym łoknie siedziała baba przi saturatorze choby kaj we Wilnowie i loła zelter do glaskow, jak była zmierzło to godała mularzom sie zelter niy nolerzy, jak miała dobro launa to i cykła zoftu do zeltra, kiery noleżoł sie tym co robili na kuźni.

Jednego razu łaziła po kuźni jakoś komisjo i dała pozor co ni momy nic na uszach, łod tego czasu dostali my frupy do uszof.

We PEBEROWIE robiłech wiyncy nisz rok, ale co sie dzioło na Bombaju niy mom pojyncio, miołech sfoje sprawy na gowie, ze brygady trefiłech pora razy yno Józka kiery zrobił ogólniak, a potym sztudyrowoł i łostoł ksiyndzym. Jak po latach szołech na torg to po Bombaju niy było śladu, tera je tam parking. We albumie "Mała Ojczyzna Rybnik" znodłech fotka na kieryj je Bombaj za starego piyrwy jako Schloss Restaurant.