Telewizor kolorowy wygrołech we Dziynniku Zachodnim za piyrszy prajs we konkursie
Piyrszy telewizor we Palowicach byłech łobejżeć ze omom Hyjdlom i modszymi siostrami, mono 60 lot nazot, we wsi były jeszcze ze trzi strzechy, ale niy tam kaj był telewizor. Telewizor widzieli my bes prog, bo delofka we izbie była posztrajchowano czerwonom lakfarbom i wyfroterowano. Na telewizorze była bioło serweta ze krałskami na kierej stoła blumwaza, abo kuminiosz ze łotpustu, a mono co inkszego tego jusz niy pamiyntom. Telewizor niy był załonczony bo program zaczynoł sie ło piontej po połedniu.
Telewizorow zaczło doś drap przibywać, jak jechali kolarze we Wyścigu Pokoju to lecieli my bes poł wsi do Wilusia paczeć jak jadom, bajtli było cołko izba. Wszyskie bajtle zaglondali na "Znak Zorro" i potym tyrali ze szpadami ze patyka abo lajsty po cołkij wsi. Starsi tysz łazili do somsiadow na "Kobra" abo inksze filmy.
Jak nastały wolne soboty to sie znot 2 program we telewizorze i trza było cołko sobota zaglondać na Studio 2. Kiedy kupiłech czorno - bioły telewizor niy pamiyntom, ale kolorowy to jusz ja, Nelka załatwiła kartki "G" i mieli my telewizor kolorowy, rok pryndzy jak Polok łostoł Łojcym Świyntym, yno cza było mieć nowo antyna. Jak przibijołech rułka gwoździym krokwiokym chachnyłech sie ze cołkij siły młotkym we palec, zdało sie, że popuszcza do galot. Palec zrobił sie czorny jak sadza, bołech sie że może mi uschnyć abo co, ale doktor go łobejżoł i pedzioł, co niy bydzie tak źle i faktycznie tera palec je ganc dobry. Jak przijechoł Łojciec Świynty do Polski zaś my sie śpiychali łoglondać go we telewizorze.
Potym to jusz nastało wideło, diwidi rostomańte satelity. Telewizor kolorowy wygrołech we Dziynniku Zachodnim za piyrszy prajs we konkursie. Do tego redachtorka Grażyna Kuźnik zrobiła zy mnom wywiad, niy było to jak we Tele Echu bo byłech słaby jak cwist, ani mi sie godać niy chciało bo za pora dni trefił mie Hercszlag.
Małom synsacjom był wystymp gospodyń ze Bełku, w programie u Drzyzgi, miały tam pedzieć co myślom ło przeskoczkach. No i prziszoł taki czos, co Telewizjo Katowicko przijechała zaglondać nom go garcy i misek, a to skuli makowki kiero warzyła Nelka ze koleżankami ze KGW Bełk. TVP Katowice przijechała tysz do bełkowskij remizy kamerować przedstawiynia gospodyń jak "Ana Marika Rozbawiono" i inksze, za niom Česká televize Ostrava przileciała kamerować jak gospodynie ze koł KGW we Bełku i Dymbiyńsku szkubiom piyrzi i biesiadujom przi bonkawie i tortynsztiku. A Rybnicko telewizjo TVT sztyjc depce po piyntach gospodyniom na bestydziyń i łot świynta i niy yno gospodyniom bo widuja ich czynsto we Czerwionce - Leszczynach.
Rod słuchom tukej Ślonski Szlagiery bo na teledyskach pokazujom tysz Ślonski zabytki jak pałac we Mosznej, abo Pławniowicach, zomek we Chudowie, rynek we Raciborzu, Nikiszowiec i inksze piykne obiekty. Dzisio człowiek ani sie niy kapnie kiedy "wystompi" we telewizji, bo dzisio we kożdym Kaufhałzie i małym sklepiku wiszom kamery i kożdego kamerujom. Jak włazisz do Oszołomu to mogesz sie przejżeć na ekranie jak we żdżadle, poprawić se włosy jak je mosz, abo binder czy zapnyć szaket.
POLECAMY PAŃSTWA UWADZE:
Jak czytać kolory szlaków turystycznych?
Dołącz do nas na Facebooku!
Publikujemy najciekawsze artykuły, wydarzenia i konkursy. Jesteśmy tam gdzie nasi czytelnicy!
Kontakt z redakcją
Byłeś świadkiem ważnego zdarzenia? Widziałeś coś interesującego? Zrobiłeś ciekawe zdjęcie lub wideo?
